Mustafa Dayişi Atolye

Andğa Dayişa bidaûu. Ôaôu do Nandidi merze orûu xolo.. Dayi-şüimişi bere Sûanbolişa giktudoûu. Mati Dayişa bidaûu. Seferi avla elebiûişa domanöinu. Gza elamti orûu. Miti miti va maâiru. Seferi avla raüani elebiûişa mezareluği toli kocemavalu. Şüunepeşi mezareluği orûu. Babaşüimi nandidi do da-şüimi Nebi hey ncaûes. Mezareluği durğunopina diyudorûu. Va dolileûu. Nebi dadalape mendebuğiüo ma maduşunu.

Nebi, Nezişi ûubina orûu. Nezi komoborditu do Nebi aşi tuteri orûuşa domiğures. Zehirli isali aünudorûu. Didinana doktorişa varoşüu.. Nana şüimi aüalaôaru. Xolo Didinana mu diöin ya uwu. Himuşeni ğuru Nebi.. Didinana cenöareri var uğuûuyi va mişüun.

Nebi gomindunes. Himuşi ğura guri dolomiöu. Ûubinape wulu da şüimi Lu şüala dobipayitu. Nezi şüimi orûu. Nebi Lu şi.Cenaze ndğa Lu Nebi şeni ibgaûu do muşeni şüimi na on ğuru iûuûu. Ma daa didi borûi. Tubinape va gamapkatumûi.

Raüani golobitişa guri emampu a mezare kva ti var uğuûu da şüimi.

Dayi-şüimişi oxorişa bidisi avla mitonpe komaâiru. Dayi şüimi-şüala osinapu şeni merkez çoyişa moxtedorûu.

Dayişüimi tabanca atolyesi oxori doloxe uğuûu. Lazuri tabanca xete ikumûu. Eveli atolye merze oxori germa doloxe uğuûu. Huy çoi oxori dulya ikumûu. Bere borûişa na bikumûi sûeri odamuşişa kamafûi. Tabanca ôare dei egete demiri şirumûu. Oda doloxe demiri şura aleûu. Aüaleti çoruği keludguûu.

Dayi şüimi didi üoçi orûu. Him eni zade ixoronamûuşa maoroperûu. Dayi şüimişi bozonta dobiyiüo ma biûurûi. Baba şüimi bere borûişa va biçini. Sûanboli orûu. Mati Dazi şüimişi bozonta borûiüo deyi komebozmorûi.

Çili muşi uneneli a oxorâa orûu. Dayi şüimi şeni a antesi oxorza diöiûu. Him miti şüala zade var isinapamûu.

Berepe avla ibiûes. Şüimi emsali bere var uyonuûes. Didi biöi muşiti şüimda wulu orûu.

Serende komebazmoni. Ôaôuşi ğunepe hey cudguûes. Ôaôu oxori topri va mokvatumûu. Topri zade ti va maşkomeûes, makneûes.

Dayişüimi elaxunu guri cemadven. Soyli şüimi didi dayi şüimişi bere orûu. Sozi na oüobxvituşeni Dayi guri caûudorûu. Sozli şüimi çoyişa keüemayonu. Ham dulya diyas ya miwu . Var buwvişi ti cobu igzalu. Sozli şüimi, Dayi mu uwu va mişüun. Dayişüimi him dulyaşi va misinapamûu.

Ukaşxe Heva Xala komexûu. Heva Xala ôaôuşi eksalefe orûu. Dayişüimişi bere nandidi ayeûu. Heva Xala seferberluği şüiûi waneri ar bere orûu. Samsunişa Bafraşa kuşxete mendaxûes. Heko ar yegeni muşi xe naşkvalinu do gundunu. Heva Xala evelurepeşi zade isinapamûu. Sozlişüimi na mebaşüvi şeni mutu var aâiûetu.’Bese Xanumi ‘ miwomerûudo memonzgilamûu.

Heva Xala ham avlapeşi wipri orûu. Him pupuli sûeri dobazgamûudo guluûu. Oroperi nandidi. Melenüale bayiri na uwomeûes raüani iâiûu. Enogu heko süuduûes . Ukaşxe mole komoxûes. Nanaşi sulale zade koçi var orûu. Moselerepeti korûes.

Arti nanaşi emuca korûu. Mamudina musûafa. Dayi şüimişi yoxo himuşa mulun. Sûanboli zuğa dolişüidu iûunan. Oxorâa muşi var aoroperûu Mamudina Mustafa.Gurbeûişa iûuşa oxorâa muşi meyiçu. Haşote ar daa çoyişa mo gvaktina ya. Mamudina Musûafa zade mskva koçi orûu. Çouri bozontalepe ekvantxozetes.

Ar ndğa Merkez çoi Şerife Xala elebaktidorûu. Ma azirusi ibgaru. ’Mamudina Mustafa numgvas ‘ ya tku. Nanaşi emuca mebumgvartiyi?

Nanaşi ocaği didi orûu. Ôaôu oxvamu kuşüuûu. Dayi şüimi ti ôaôu numgvarûu. Çoişi dixa hini uğuûes. ôaôuşi ocaği didi orûu. ôaôu istixare oxenu kuşüuûu. Ezmoce âiramûu üoçepe nuşveûu. Ma xvala guri cemiûinu. Ma makva bere borûi hişo iûunan. Dayi şüimişi biöi komemikadu. Sozi ceptoçisi ôaôuşi meyoçamuşa zade maşüurinu.

Memeûi iyilusi ma derdi cemanâirusi  Dayi şüimiti Sûanbolişa komexûudorûu. Dayişüimi ôaôu meyomçu ma buwvi. Dayi şüimi ‘ hişo mo iduşunam ôaôu didi üoçi orûu va meyiçams ‘ya miwu. Ôeya ôaôuşi meyoçamute mworaûuyi... Ôaôuşa maşüurineûu..

Dayişüimişi bere Cuma domawonu. Hişo var orûuüo mendraşa olva va domaçiraseûu. Ma gza şüimi cebrerûi Eksalefe şüala va bikomoci.

Dayişüimi meboweda muperepe gomaşineûu. Didinana bere borûişa ordoşa momiyonamûu Dayişüimişi oxorişa. Zade var dogutuûu. Ordoşa gikteûu. Dayişüimişi oxori zade maoroperûu. Nana sûeri tuéa orûu ham oxori. Berepe irote baba üale dozdamûes. Ma curi ocağiti maoroperûu.

Selma Koçiva Marûi 2001