Hafize Xala

Xokvatişa bidasi irote Hafize Xala cari dulya ikumûaşa ocxi gowureûuşa bâiramûi. Luu nobamtu irote bidasi.

Hafize Xala şku Koçivapeşi tarixi na isinapas dida orûu. Koçivapeşi ôaramiûepe(öykü) himuşa bognamûitu. Eveli ar Üoöo korûu, Koçivapeşi begi. Yaylapeşa moxûes do Dutxe’şa komoxtes ya iûurûu. Sum Cuma orûes. Arso yayla kodoxedu. Him doğuru. Kva cindo ‘hako osüedinu var on‘ ya kononçaru. Mancura Cuma Celayesüuri kodiürexu. Arso ti Xokvatişa komoxûu. Haşote Koçivape cinâires.

Hafize Xala timişi şi goüoru hiçi va ginkturu. Foûa muşi ôoûe var elaûoçu. Him a didi lazi oxorâa orûu. Ocaxi bozonta ortu. Badi muşi noğa üale moyonudorûu. Badimuşi memoğoli maliçane oxorişa komoyonu. Babamuşi ocaxi çona kocedu Hafize Xala şkala..

Bere borûişa Hafize xala şüala osinapu zade xazi mayeûu. Him evelurepeşi isinapamtaşa ma tuéa soba cilendo üaûu steri kelabxeduûi. Xokvaturi berepe oburuşa miyoxaniosinapu mebaşkumti do guri komomaleûu.’ Huy mogangonesi’ buwomerûi.

Hafize Xala üaûa çoyişa bda komobigoram. Eûoçeri xepeşa bancuder. Muöo oren dei cebonöitxam. Gverdi na domiskudun osinapu miti na va capaşasen steri dobusinapam.

İrote bulur Dutxeşa Xokvatişa. Hafize Xala na var skudun çoi muço iyen va cemazadinen. Berepeşi tolepe na mazin şvena var orûuüo hişo olvate toli çilambri kodomigutaseûu.

Kata mapxa Xokvatişa bidasi Hafize Xalaşi avla na ibinan berepe şüala ma ti evelurepe mebozmor.

Hafize Xalaşi oxori üaôula Didinanaşi oxori orûu. Miti na va xen oxorişi avla dulya na ikuman oxorzalepe mişvacaman. E do Didinanşi şuri hini şüala iyen. Didinanşi şuri dulya na ikums oxorzalepe şüala iyen.

Ğormoûi Hafize Xala do Didinanna var oren ndğalepe mo domiûas. Haninepeşa hini suzi vato momala. İsinape oşüena na golancas Dutxeşa var eşüemalasen. Xokvaturi berepe toli va dolomawomilasen.

Gza kiziru buluru.. Didinana Hafize Xala mebuşkum. Him kelvakatana va nkaçasen Didinana şkimi. Ma bigzala şikule hişote konuxondaasen Mi uşkun gobiktasi ma bowedare hini curiti..

Selma kociva Bulora 2001